McCarthy ailalamikia FKF kwa kuvuruga maandalizi ya Harambee Stars

Kocha wa timu ya taifa ya kandanda Harambee Stars, Benni McCarthy, ametoa wito kwa Shirikisho la Soka la Kenya kuweka nyumba yao sawa ikiwa wanataka kuimarisha kandanda nchini Kenya. McCarthy anasema matatizo ya FKF yameathiri mipango ya timu ya taifa, huku baadhi ya wachezaji wakubwa barani Ulaya wakikataa wito wa kuichezea Kenya. Wachezaji hawajafanya mazoezi tangu walipoingia kambini Jumatatu, wakidai posho ambazo hazijalipwa, pamoja na vifaa bora vya kupiga kambi nchini Kenya na wanapocheza ugenini. Wachezaji waliwasili kambini Jumatatu na Jumanne, lakini hakuna mpira uliopigwa. Wachezaji hao wanataka kikao na Waziri wa Michezo Salim Mvurya au Rais William Ruto ili washughulikie malalamishi yao. Na sio wachezaji pekee. Kocha Benni McCarthy na timu yake ya ufundi wana wasiwasi mkubwa, kwani wamekuwa wakifanya kazi nchini Kenya kwa mwaka mmoja na nusu bila nyaraka zinazofaa. McCarthy anasema pia amechanganyikiwa, kwani baadhi ya wachezaji ambao wameichezea Harambee Stars hapo awali wamekataa wito wa hivi majuzi kwa sababu ya kukatishwa tamaa na ahadi zilizovunjwa.